१३ वैशाख
पाेखरा । पाेखरामा मेयर पदमा एमालेले दीपक पाैडेलकाे सट्टामा कृष्ण थापालाई उम्मेदवार बनाइरहँदा काँग्रेसले पनि उपमेयरमा सुरेन्द्रमान बिजुक्छेकाे स्थानमा काेपिला रानाभाटलाई अन्तिम अवस्थामा अघि सारेकाे छ ।
गठबन्धनबाट मेयर पद एकीकृत समाजवादीकाे भागमा परेकाेमा उपमेयर काँग्रेसले लिएकाे हाे । मेयरका उम्मेदवार धनराज अाचार्य र उपमेयर उम्मेदवार रानाभाटले मनाेनयन दर्ता गरिसकेका छन् ।
नेपाली कांग्रेस, कार्यसम्पादन समितिको निर्णयानुसार सभापति शेरबहादुर देउवाले पाेखराकाे उपमेयरमा बिजुक्छे र भरतपुरकाे उपमेयरमा चित्रसेन अधिकारीलाई सोमबार बिहान मात्र टिकट दिएका हुन् । तर, पछि सुरेन्द्रमानकाे स्थानमा काेपिलालाई टिकट दिएर मनाेनयन दर्ता गरेकाे हाे । सुरेन्द्रमान पोखरा महानगर सभापति हुन् ।
सत्ता गठबन्धनबीच भरतपुरको मेयर माओवादी केन्द्र र पोखरा महानगरको मेयर एकीकृत समाजवादीलाई दिने सहमति भएको थियो । उक्त सहमति अनुसार भरतपुरको मेयरमा माओवादी केन्द्रले रेनु दाहाल र पोखरामा एकीकृत समाजवादीले धनराज आचार्यलाई उम्मेदवार बनाइसकेका छन् । तर, कांग्रेसभित्र भने भरतपुर र पोखरा महानगरको मेयर अन्य दललाई दिएको भन्दै असन्तुष्टि चुलिएको छ ।
