११ असार
गुल्मीको इस्मा गाउँपालिका वडा नं ५ का ४१ वर्षिय यामबहादुर कुमालले केहीवर्षकाे अन्तरालमा दुई श्रीमतीको हत्या गरेका छन् । उनका चार छोराछोरीको बिचल्ली भएको छ ।
पहिलो श्रीमतीको हत्या गरेर जेल गएका उनी संविधान दिवसको अवसरमा सरकारको सिफारिसमा राष्ट्रपतिबाट कैदमिनाह भएर बाहिर आएका थिए । अहिले कान्छीको हत्या गरेर फेरि जेल जाने भएका छन् ।
यामबहादुरका पहिलो श्रीमतीतर्फ २ छोरी र १ छोरा तथा दोस्रो श्रीमतीतर्फ १ छोरा गरी चार जना सन्तान छन् । दुवैतर्फका बच्चाको आमाहरू मारिएको र बुवा यामबहादुर पुनः जेल जाने भएपछि उनीहरूको बिचल्ली हुने स्थानीयको भनाइ छ ।
इस्मा ५ का वडाध्यक्ष झविन्द्र अर्यालका अनुसार मङ्गलवार दिउँसो यामबहादुरले श्रीमतीलाई दिउँसो पनि कुटपिट गरेको स्थानीयले सुनाएका थिए । तर राती पुनः कुटपिट गरी मारेर छिमेकीको घरछेउमा फालिएको अवस्थामा बुधबार बिहान भेटिएपछि प्रहरीलाई बोलाइएको हो ।
जिल्ला प्रहरी कार्यालय गुल्मीका अनुसार इस्मा गाउँपालिका–५ रातामाटाका ४१ वर्षिय यमबहादुर कुमालले मादक पदार्थ सेवन गरी आफ्नी ३७ वर्षिया श्रीमती मुना कुमालमाथि दाउराको चिर्पटले प्रहार गरेर हत्या गरेका हुन् ।
कुटपिटबाट शरीरका विभिन्न भागमा गम्भीर चोट लागेर अचेत भएकी मुनालाई सूचना प्राप्त हुनासाथ प्रहरी चौकी धनार्जेबाट खटिएको टोलीले उद्धार गरेको थियो । उनलाई उपचारका लागि जिल्ला अस्पताल तम्घास पुर्याएको तर उपचारकै क्रममा बुधवार नै चिकित्सकले मृत घोषणा गरेका हुन् ।
घटनामा संलग्न यमबहादुर कुमाललाई नियन्त्रणमा लिएको र घटनाबारे थप अनुसन्धानका लागि जिल्ला प्रहरी कार्यालय गुल्मीबाट प्रहरी निरीक्षक विवेक घलेको नेतृत्वमा अनुसन्धान टोली खटाइएको छ ।
‘यामबहादुर पहिलो श्रीमती हत्या गरेर जेल गएको, कैद मिनाहपछि बाहिर आएको र हिजो कान्छी श्रीमतीको पनि हत्या गरेको खुलेको छ । सबै मिति अझै स्पष्ट भएको छैन । उनलाई नियन्त्रणमा लिएर अनुसन्धान अभि बढाएका छौँ ।’
वडा नं ५ का अध्यक्ष अर्यालका अनुसार हिजो राती भएको उनले श्रीमतीलाई मारेर छिमेकी भोजराज भण्डारीको घर पछाडिको कुर्सुलोमा फालेका थिए ।
