२६ जेठ
काठमाडौँ । नेपाली कांग्रेसका सचेतक निश्कल राईले प्रधानमन्त्रीले नेपाललाई ‘सीमा अतिक्रमणकारी’ प्रमाणित गर्न खोजेको भन्दै आपत्ति जनाएका छन् ।
प्रतिनिधि सभाको बैठकमा आकस्मिक समयमा सचेतक राईले नेपालले छिमेकी देशको कुनै पनि भूभाग नमिचेको र नेपाल विश्वको नजरमा कहिल्यै ‘अतिक्रमणकारी’ बन्न नसक्ने बताएका हुन् ।
सचेतक राईले प्रधानमन्त्री र उनका शुभचिन्तकहरूले नभएका प्रमाणहरू सिर्जना गरेर नेपालले भारतको जग्गा मिचेको प्रमाणित गर्न खोज्नु गम्भीर राष्ट्रघात भएको आरोप लगाए । ‘मेयर हुँदा कार्यकक्षमा ग्रेटर नेपालको नक्सा राख्ने प्रधानमन्त्रीले आज कस्तो स्वार्थमा हाम्रो स्वाभिमानमाथि धावा बोल्दै हुनुहुन्छ,’ उनले प्रश्न गर्दै भने । प्रधानमन्त्रीको यस्तो अभिव्यक्तिले सीमा रक्षाका लागि ज्यान दिने वीर सहिदहरूको अपमान भएको राईको तर्क थियो।
राईले प्रधानमन्त्रीको विवादास्पद अभिव्यक्ति संसद्को रेकर्डबाट हटाउन निर्देशन नदिएकोमा सभामुखप्रति पनि असन्तुष्टि व्यक्त गरे । ‘हामी सभामुखको अभिभावकत्व चाहन्छौँ। खुट्टा नकमाई रुलिङ होस् र प्रधानमन्त्रीले रोष्टममा उभिएर राष्ट्रहित विपरीतका आफ्ना कुरामा आत्मालोचना गर्दै माफी माग्नुपर्छ,’ राईले भने ।
