२९ असोज
पोखरा-१२ शितलादेवीको हिटिमार्गमा सोमबार बेलुकी पेस्तोल देखाएर स्थानीय महिलाको सुन लुट्ने युवक पक्राउ परेका छन् । यद्यपी, पेस्तोल नक्कली भएको कास्की प्रहरीले जानकारी दिएको छ ।
पोखरा-१२ बस्ने देविकला अधिकारीलाई पेस्तोल देखाई लुटपाट गरेको भन्ने सूचना प्राप्त हुनसाथ तत्काल वडा प्रहरी कार्यालय रामबजार कास्कीबाट प्रहरी टोली खटिई गई अनुसन्धान गर्दा जिल्ला पर्वत मोदी गाउँपालिका वडा नं. १ स्थायी ठेगाना भई हाल पोखरा महानगरपालिका वडा नं. २० भलाम बस्ने वर्ष २४ को सुजन वि.क.लाई नक्कली पेस्तोल १ थान र उनले प्रयोग गरेको मोटरसाइकल सहित पक्राउ गरी थप अनुसन्धान प्रकृया अगाडि बढाइएको कास्की प्रहरीले जनाएको छ ।
सोमबार बेलुकी करिब ८:३० बजे अधिकारीको घाँटी र कानमा लगाएको सुन तान्ने क्रममा उनले हार गुहार गरेपछि ती युवक भागेका थिए ।
ग १३ प ९८३२ नम्बरको पल्सर मोटरसाइकलमा आएका बिकले सिक्री तानेर कानको रिङ तान्न लाग्दा केही समय लछार पछार भएको र छिमेकीहरुले तुरुन्त प्रहरीलाई खबर गरेका कारण भाग्दा भाग्दै रामबजार प्रहरीले पक्राउ गर्न सफल भएको छ ।
सुन लुछ्ने क्रममा महिलाले प्रतिकार गर्दैगर्दा बिकको मोटरसाइकल ढल्यो । त्यस पछि हेलमेट नै लगाएर भागेका थिए ।
तत्कालै स्थानियले प्रहरीलाई खबर गरेपछि पोखरा–१२ को भेटनरी नजिकबाट रामबजार प्रहरीले युवालाई नियन्त्रणमा लिएको छ ।
