१४ साउन

काठमाडौं । सोमबार राति करिब ९ बजे कलंकीमाई मन्दिरछेऊ रहेको पूर्वउपसचिव विष्णुप्रसाद शर्माको घरमा एक्कासि सिसा फुटेको आवाज आयो । शर्माकी १९ वर्षीया छोरी पढिरहेको कोठामा सिसा फुटेपछि घरका सदस्य त्यसतर्फ दौडिएर पुगे ।

त्यहाँ पुग्दा कोठाभित्र गोली जस्तो वस्तु देखियो । लगत्तै उनीहरुले प्रहरीलाई खबर गरे ।

‘हामी गएर हेर्दा पेस्तोल नभई सानो २.२ एमएम हतियारको जस्तो देखिने गोली बरामद भयो’, काठमाडौं प्रहरी परिसर, टेकुका प्रमुख उत्तमराज सुवेदी भन्छन्, ‘यो किसिमको गोली सिकार प्रयोजनका लागि प्रयोग हुने गर्छ ।’

गोली कसले र किन चलायो भन्ने विषयमा सुक्ष्म अनुसन्धान भइरहेको सुवेदीले  बताए । हालसम्मको अनुसन्धानले दुर्घटना वस गोली चलेको हुनसक्ने देखाएको जनाइएको छ । तर, घटनापछि कसैको नियत थियो/थिएन भन्ने अझै निर्क्योल भइसकेको छैन ।