२६ वैशाख
पोखरा । पोखरा नगरपालिका–१७ कि किशोर र सपना भण्डारी दम्पत्ति बिहीबार एकैपटक तीन सन्तानको बाबुआमा बने । सपनाले मणिपाल शिक्षण अस्पतालमा तिम्ल्याहा सन्तान जन्माएपछि यो दम्पत्तिको खुशीको सीमा छैन ।

बुधबार बेलुका सपनालाई ब्यथा लागेपछि किशोर र परिवारले पोखराको मणिपाल शिक्षण अस्पताल पुर्‍याए । किशोर र उनको परिवार नयाँ सदस्यको आगमनको प्रतीक्षामा थिए । बिहीबार बिहान डाक्टरले सपनाको शल्यक्रिया गर्नुपर्ने बताए ।

अप्रेसन थियटरमा सपनालाई लगियो । बाहिर किशोर र परिवारले प्रथना गरिरहे, ‘सब ठीक हुने छ । सुखद खबर सुन्न पाइने छ ।’

‘साढे १ बजेतिर डाक्टरले खबर सुनाएँ । हामी ३ सन्तानको बाबुआमा भएछौं,’ किशोरले  सुनाए, ‘हाम्रो लागि यो दुर्लभ खुसी हो । घरमा बुवा, आमा, हजुरआमा सबै जना खुसीले गदगद हुनुहुन्छ ।’

७ महिनामै जन्मिएका तीनै जना सन्तान र सपनाको स्वास्थ्य अवस्था सामान्य रहेको किशोरले सुनाए ।

सपनाले २ छोरा र १ छोरीलाई जन्म दिएकी हुन् । पहिलो बच्चाको रुपमा जन्मिएकी छोरी १.३ केजी तौलकी छन् । दोस्रो र तेस्रो बच्चा समान १.२ केजी तौल भएका छोरालाई सपनाले जन्म दिएकी छन् ।

यसअघि गत माघ २ गते स्याङ्जाकी सुनिता प्रधानले ४ शिशु जन्माएकी थिइन् । दुलर्भमात्रै ३/४ शिशु जन्मिने डाक्टर बताउँछन् ।