६ कार्तिक जाजरकोट । चुनावी गठबन्धन हुँदै पार्टी एकतासम्म जाने भनेको नेकपा एमाले र नेकपा माओवादी केन्द्रको वाम गठबन्धन जाजरकोटमा धरापमा परेको छ ।

प्रतिनिधिसभा र प्रदेशसभाको पहिलो चरणको निर्वाचनका क्रममा दुबै दलले आ–आफ्ना तर्फबाट उम्मेदवारी मनोनयन दर्ता गराएपछि वाम गठबन्धन धरापमा परेको हो ।

प्रतिनिधिसभामा जाजरकोटबाट माओवादी केन्द्रका नेता शक्तिबहादुर बस्नेतलाई उम्मेदवार बनाउने वाम गठबन्धनको सहमति विपरित एमालेले गोविन्द्रविक्रम शाहलाई उम्मेदवार बनाएपछि यो गठवन्धन धरापमा मात्र परेन भत्किएको अट्कल शुरु भएको छ।

प्रतिनिधिसभा सदस्यका लागि बस्नेतले दिउँसो नै उम्मेदवारी दर्ता गराएका थिए भने एमालेका शाहले बस्नेतले गराएको केही समय पश्चात उम्मेदवारी दर्ता गराएका हुन् ।

त्यस्तै प्रदेशतर्फ दुबै क्षेत्रमा एमालेलाई उम्मेदवार बनाउने भन्ने गठबन्धनमा भएको सहमति माओवादीका जिल्ला तहका नेताको असन्तुष्टीपछि भत्किएको थियो ।

माओवादीले प्रदेशतर्फ क मा गणेश सिंह र ख मा नरबहादुर कार्कीको उम्मेदवारी दर्ता गराएको छ ।

माओवादीले आइतबार बिहान मात्र हुम्लामा प्रदेशतर्फ एक सीट एमालेलाई छोडेर जाजरकोटमा लिने भनेर गरेको सहमति अनुसार जाजरकोटबाट प्रदेशसभामा उम्मेदवारी दर्ता गराएको थियो ।

हुम्लामा एक सिट लिने र जाजरकोटमा छोड्ने सहमतिबारे पार्टी केन्द्रले कुनै जानकारी नदिएकोले आफूहरुले उम्मेदवारी दर्ता गराएको एमालेका प्रदेशतर्फका उम्मेदवार निरज आचार्यले जानकारी दिए ।

एमालेले प्रदेशतर्फ क मा निरज आचार्यलाई र ख मा करबीर शाहीलाई उम्मेदवार बनाएको छ ।

LEAVE A REPLY

Please enter your comment!
Please enter your name here