२ असोज काठमाडौं । सत्तारुढ नेपाली कांग्रेसले आगामी मंसिरमा हुने भनिएको प्रदेश सभा र प्रतिनिधि सभा निर्वाचनका लागि उमेदवारका आकांक्षीको नाम सिफारिश गर्न निर्देशन दिएको छ । प्रधानमन्त्रीको सरकारी निवास बालुवाटारमा सोमबार बसेको कांग्रेसको कार्य सम्पादन समितिले असोज तेस्रो साताभित्रै प्रदेश सभा र प्रतिनिधि सभा निर्वाचनका लागि उमेदवारका आकांक्षीको नाम सिफारिश गर्न स्थानीय समितिलाई निर्देशन दिएको हो ।

बैठकले देशैभरीका गाउँ र नगर कार्य समितिलाई असोज १० गतेभित्रै उमेदवारका आकांक्षीको नाम क्षेत्रीय कार्य समितिलाई सिफारिश गर्न निर्देशन दिने निर्णय गरेको कांग्रेसका मुख्य सचिव कृष्ण पौडेलले जानकारी दिए । उनका अनुसार गाउँ र नगर कार्य समितिले गरेको सिफारिशअनुसार असोज १३ गतेभित्र जिल्ला कार्य समितिलाई आकांक्षीको नाम पठाउनुपर्नेछ ।

बैठकले असोज १७ गतेभित्र क्षेत्रबाट सिफारिश भएका उमेदवारका नाममध्येबाट उपयुक्त उम्मेदवारको नाम रायसहित पठाउन भनेको छ । मूख्य सचिव पौडेलले भने, ‘‘जिल्लाले क्षेत्रबाट आएको सिफारिशका आधारमा आकांक्षी उमेदवारको नाम असोज १७ गतेभित्र पठाइ सक्नुपर्नेछ ।’’

बैठकले जिल्लाबाट आकांक्षीको नाम सिफारिश गर्दा प्रत्येक क्षेत्रबाट एक जना महिलासहित तीन जनाको नाम सिफारिश गर्नुपर्ने निर्णय गरेको छ । मुख्य सचिव पौडेलका अनुसार जिल्ला कार्य समितिले हरेक क्षेत्रबाट तीन जना प्रदेश सभाका लागि र तीन जना प्रतिनिधि सभा निर्वाचनका सिफारिश गर्नुपर्नेछ  ।

देशैभरीका जिल्लाबाट असोज १७ गते भित्र उमेदवारका आकांक्षीको नाम सिफारिश भएपछि असोज १८ गतेबाट उमेदवारको टुंगो लगाउने काम सुरु गर्ने बताइएको छ । ‘‘नाम सिफारिश भइसकेपछि १८ गतेबाटै उमेदवारको टुंगो लगाउने काम हुनेछ,’’ उनले भने ।

गत भदौ १४ गते बसेको मन्त्रिपरिषद बैठकले प्रदेश सभा र प्रतिनिधि सभा निर्वाचन दुई चरणमा गर्ने निर्णय गरेको थियो । सरकारले पहिलो चरण अन्तरगत मंसिर १० र दोस्रो चरण अन्तरगत मंसिर २१ गते चुनाव गर्ने तयारी गरिरहेको छ । संवैधानिक व्यवस्थाअनुसार आगामी माघ ७ गतेभित्रै प्रदेश सभा र प्रतिनिधि सभा निर्वाचन गराई सक्नुपर्नेछ ।

यसैबीच नेपाली कांग्रेसले एउटा निर्वाचन क्षेत्रबाट कम्तिमा पनि १२ जना आकांक्षी सिफारिस गर्न भनेको छ ।

प्रतिनिधिसभा निर्वाचनको लागि प्रत्यक्षतर्फ ३ जना, समानुपातिकतर्फ ३ जना, प्रदेशसभाका लागि प्रत्यक्षतर्फ ३ जना र समानुपातिकतर्फ ३ जना गरी एउटा क्षेत्रबाट कम्तिमा १२ जनासम्म सिफारिस गर्न सकिनेछ ।

यस्तो छ प्रेस विज्ञप्ती पूर्णपाठ सहित

मिति ः २०७४ आविश्न २
प्रेस विज्ञप्ति

आगामी प्रतिनिधि सभा र प्रदेश सभा सदस्य निर्वाचनका लागि प्रत्यक्ष र समानुपातिक तर्फ उम्मेदवार छनौट गरी केन्द्रमा सिफारिस गर्नका लागि नेपाली कांग्रेस केन्द्रीय कार्य सम्पादन समितिको २०७४ आश्विन १ गते बसेको बैठकले देहाय बमोजिम हुने गरी निर्णय गरेकोछ ।

१. बैठकमा सहभागिता र अध्यक्षता
(क)  निर्वाचन क्षेत्रः  हाल कायम हुन आएको निर्वाचन क्षेत्रमा आफ्नो क्रियाशील सदस्यता रहेको पार्टीका केन्द्रीय सदस्य, सांसद, जिल्ला सभापति, क्षेत्रीय सभापति, महाधिवेशन प्रतिनिधि÷महासमिति सदस्य, दोस्रो संविधान सभा निर्वाचनमा सो क्षेत्रको प्रत्यक्ष तर्फका उम्मेदवार, क्षेत्रीय सभापतिको पदको निर्वाचन भएको भए सो पदको निर्वाचनका निकटतम प्रतिस्पर्धी, क्षेत्रीय कार्यसमितिका पदाधिकारी तथा सदस्यहरु सो क्षेत्रको बैठकमा सहभागी हुनेछन् । हाल कायम हुन आएको क्षेत्रको मतदाता नामावलीमा आफ्नो नाम रहेका क्षेत्रीय सभापतिहरुमध्येबाट उमेरमा ज्येष्ठतम सभापतिले बैठक बोलाउने र बैठकको अध्यक्षता गर्नेछ ।
(ख)  जिल्लाः जिल्ला सभापति, हाल कायम हुन आएको जिल्लामा आफ्नो क्रियाशील सदस्यता रहेको पार्टीका केन्द्रीय सदस्य, सांसद, दोस्रो संविधान सभाका प्रत्यक्ष तर्फका उम्मेदवार, जिल्ला सभापति पदको निर्वाचन भएको भए सो पदको निर्वाचनको निकटतम प्रतिस्पर्धी, जिल्ला कार्यसमितिका पदाधिकारी तथा सदस्यहरु सो जिल्लाको बैठकको निर्णय प्रकृयामा सहभागी हुनेछन् । जिल्ला सभापतिले बैठक बोलाउने र बैठकको अध्यक्षता गर्नेछ ।

२.  उम्मेदवार सिफारिश
(क) जिल्लामा एक संसदीय क्षेत्र रही हाल पनि एकै निर्वाचन क्षेत्र यथावत कायम भएकोमा जिल्लाले उम्मेदवारको सिफारिश गरि केन्द्रमा पठाउनेछ ।
(ख) जिल्लामा एक भन्दा बढी निर्वाचन क्षेत्र रहेकोमा हाल पनि सोही संख्यामा निर्वाचन क्षेत्र यथावत कायम रहेकोमा क्षेत्रले उम्मेदवारको सिफारिश गरी जिल्लामा पठाउनेछ । क्षेत्रको सिफारिशमा आफ्नो राय सहित जिल्लाले केन्द्रमा पठाउनेछ ।
(ग) जिल्लामा निर्वाचन क्षेत्र थपघट भई हाल एक संसदीय क्षेत्र कायम हुन आएकोमा जिल्ला सभापतिको अध्यक्षतामा जिल्ला र क्षेत्रहरुको संयुक्त बैठकबाट उम्मेदवारको सिफारिश केन्द्रमा पठाउनेछ ।
(घ) जिल्लामा निर्वाचन क्षेत्र थपघट भई एक भन्दा बढी संसदीय क्षेत्र कायम हुन आएकोमा क्षेत्रले उम्मेदवारको सिफारिश जिल्लामा पठाउनेछ । क्षेत्रको सिफारिशमा आफ्नो राय सहित जिल्लाले केन्द्रमा पठाउनेछ ।
३. उम्मेदवार सिफारिश संख्याः
प्रतिनिधिसभा र प्रदेश सभाका लागि प्रत्येक क्षेत्रबाट छुट्टाछुट्टै प्रत्यक्ष तर्फ महिला सहित बढीमा ३ जना र समानुपातिक तर्फ महिला सहित बढीमा ३ जना । समानुपातिक निर्वाचन प्रणाली तर्फ उम्मेदवारको नाम सिफारिस गर्दा समावेशी प्रतिनिधित्वको सिद्धान्तका आधारमा सम्बन्धित क्षेत्रको जनसंख्याको बनौटलाई ध्यानमा राखी (दलित, आदिवासी जनजाती, खस आर्य, मधेशी, थारु र मुस्लिम) सिफारिस गर्नु पर्नेछ ।

४. सम्बन्धित निकायले पार्टीभित्रबाट उम्मेदवारको नाम सिफारिश गर्दा निरन्तर क्रियाशील सदस्यता कायम रहेका, पार्टीभित्र र आम जनतामा लोकप्रिय एवं गत स्थानीय तहको निर्वाचनमा पार्टीको उम्मेदवारलाई विजयी बनाउन क्रियाशील भूमिका निर्वाह गरेका मध्येबाट गर्नुपर्नेछ ।
५. उम्मेदवारहरुको नाम सिफारिश गर्ने प्रयोजनका लागि पार्टीको तेह्रौं महाधिवेशनमा गठन भएका पार्टीका गाउँ ÷नगर कार्यसमितिले २०७४ असोज १० गतेभित्र आफ्नो सुझाव र सिफारिश क्षेत्रमा, क्षेत्रले आफ्नो सिफारिश २०७४ असोज १३ गतेभित्र जिल्लामा र जिल्लाले क्षेत्रबाट आएको सिफारिशमा आफ्नो राय सहित २०७४ असोज १७ गतेभित्र केन्द्रमा अनिवार्यरुपमा पठाउनु पर्नेछ । तोकिएको निकायले निर्धारित समयभित्र सिफारिश नपठाएता पनि माथिल्लो निकायले निर्णय गर्नेछ ।
६.  प्रतिनिधि सभा सदस्य निर्वाचन तथा प्रदेश सभा सदस्य निर्वाचन अन्तर्गत समानुपातिक निर्वाचन तर्फ नाम सिफारिस गरिएका उम्मेदवारहरुको “नेपाली कांग्रेस पार्टीका तर्फबाट उम्मेदवार हुन गरेको मन्जुरीनामा, नागरिकताको प्रतिलिपी, मतदाता रहेको गाउँ÷नगर, वडा नं., मतदाता क्र.सं. र २ प्रति पार्सपोर्ट साइजको फोटो” समेत लिई जिल्ला कार्यसमितिमा राख्ने र केन्द्रले मागेको समयमा तत्काल जिल्ला सभापतिले केन्द्रमा उपलव्ध गराउने ।

कृष्णप्रसाद पौडेल
मुख्य सचिव

LEAVE A REPLY

Please enter your comment!
Please enter your name here